प. पू . हंसतीर्थ स्वामी महाराज (म्हणजे पूर्वाश्रमीचे पू . हरिहरानंद महाराज ) कायम पायी प्रवास करत असत. सोनई पासून कोल्हापूर, बेळ्गाव, मुंबई, पुणे हा पायी प्रवास झाला तसेच विदर्भ, मराठवाडा, नागपूर पर्यंत प. पू . स्वामींनी पायी दिंडी एकूण ९ लक्ष कि.मी. पदयात्रा केली. श्री. क्षेत्र माहुरगढ येथेही पायी यात्रा झाली.

“सदा पायी यात्रा । अंगी दोन वस्त्रे ।
मुखी जगदंब नाम । अंतरी तळमळ जनकल्याणाची” ।।

असे त्यांचे यथार्थ वर्णन होईल . पायी दिंडी मध्ये सामान्य लोकांचे सुख दुः खे समजून घेत येतात , काही मार्गदर्शन करता येते, अशी त्यांची धारणा होती. विदर्भ, मराठवाडा परिसरामध्ये पू . स्वामींचे हजारो शिष्य झाले. औरंगाबाद येथील संग्राम नगर मध्ये (सातारा परिसर – बीड बायपास रोड )शिष्य मंडळींच्या आग्रहास्तव भगवती मंदिर उभारण्याचा निर्णय झाला.

अमृत महोत्सव सोहळ्यानंतर पू . स्वामींचे औरंगाबादला वास्तव्य असताना १९९६ मध्ये मंदिराची पायाभरणी झाली . प. पू . स्वामींनी स्वतः मंदिर आराखडा तयार केला व त्या प्रमाणेच भव्य मंदिर उभे रहिले. या स्थानास “हरिहर” नाव द्यावे असे शिष्य मंडळींचे आग्रहाचे म्हणणे होते. परंतु प. पू . स्वामी पूर्ण विरक्त आणि संन्यासी !! “मी, माझे कुणी नाही, सारी भगवतीची कृपादृष्टी!” हा भाव ठेऊन मंदिराच्या गाभाऱ्यात हर म्हणजे महादेव पिंड आणि हरि म्हणजे पांडुरंग या दोन देवतांची विधीपूर्वक स्थापना केली.